शिवप्रतिष्ठान हिंदुस्तान संघटनेचे संस्थापक संभाजी भिडे यांनी केलेल्या एका वादग्रस्त वक्तव्यामुळे महिला आयोग आता आक्रमक झाला आहे. काल भिडे यांनी मुख्यमंत्री एकनाथ शिंदे यांची भेट घेतली होती. त्यांच्या भेटीनंतर एक महिला पत्रकार त्यांची प्रतिक्रिया विचारायला गेली. तिला पाहून संभाजी भिडे म्हणाले, आधी कुंकू लाव, मग तुझ्याशी बोलेन, असे ते म्हणाले होते. त्यांच्या याच वक्तव्यावर काॅंग्रेसच्या आमदार प्रणिती शिंदे यांनी प्रत्युत्तर दिले आहे.
दरम्यान, प्रणिती शिंदे यांनी गुरुवारी भारत जाेडाे यात्रेतील सहभागाबाबत माहिती देण्यासाठी पत्रकार परिषद घेतली होती. या पत्रकार परिषदेत त्यांना भिडे यांच्या वक्तव्याबाबत विचारले असता त्या म्हणाल्या, महिलांचे काम आणि त्यांचे कर्तृत्व बघा. केवळ त्यांच्या चेहऱ्यांकडे बघून भेदभाव करण्याची मानसिकता बदला, असे म्हणत प्रणिती शिंदे यांनी भिडे गुरुजी यांच्यावर टीका केली.
महिलांना ऑब्जेक्टिव्ह म्हणून बघणे बंद करा. अमुक गाेष्ट करा म्हणून सांगणारे हे काेण आहेत? भाजपचे लोक आम्हाला देशप्रेमाबद्दल सांगतात. आमचे देशप्रेम हृदयात आहे. आम्हाला दाखवायची गरज नाही. भाजपच्या लाेकांनी महिलांबद्दलची मानसिकता बदलावी. हे लाेक महिलांचे काम आणि कर्तृत्व बघत नाही. केवळ त्यांच्या चेहऱ्यावर बघून विधाने करतात. या गोष्टी बंद झाल्या पाहिजेत, असेदेखील शिंदे म्हणाल्या.
