एकीकडे उद्धव ठाकरे गट फुटत असताना दुसरीकडे मात्र शिल्लक गटाच्या नेत्यांना केंद्रीय तपास यंत्रणा नोटिसा धाडत आहे अशातच उद्धव ठाकरे गटाचे आमदार राजन साळवी यांना ACB ने नोटीस धाडली आहे यावर आता साळवी यांनी प्रतक्रिया दिली आहे.
एसीबीकडून आलेली नोटीस ही दबावाची कारवाई सुरू असून तुरुंगात गेलो तरी उद्धव ठाकरेंसोबत कायम असणार असल्याचे आमदार राजन साळवी यांनी म्हटले.
शिवसेनेचे ठाकरे गटाचे आमदार वैभव नाईक यांच्यानंतर राजापूरचे आमदार राजन साळवी यांना लाचलुचपत प्रतिबंधक विभागाने नोटीस बजावल्यानंतर पुन्हा एकदा दबावाच्या राजकारणाची चर्चा सुरू झाली आहे. एसीबीच्या नोटिशीनंतर आमदार राजन साळवी यांनी आज पत्रकार परिषद घेत तुरुंगात डांबले तरी उद्धव ठाकरे यांची साथ सोडणार नसल्याचे सांगितले. आपण मातोश्रीशी एकनिष्ठ असल्यामुळेच ही नोटीस बजावण्यात आल्याचे त्यांनी म्हटले. या नोटिशीमागे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस असल्याचाही आरोप त्यांनी केला.