शिबीरामुळे ग्रामीण भागातील रूग्णांना याचा फायदा – प्राध्यापक मधुकर राळेभात
आ. रोहित पवार यांच्या माध्यमातून रुग्णांना मोठ्या प्रमाणात शिबीराचा लाभ
जामखेड प्रतिनिधी;-डाॅ. आरोळे हाॅस्पिटल येथे फुफ्फुसे, हृदय, हाडे, सांधे, किडनी, कान, नाक, घसा आजारांची मोफत तपासणी शिबिर संपन्न
जामखेड येथिल रहिवासी असलेले मात्र जागतिक किर्तीचे रॅमन मॅगसेस पुरस्कार प्राप्त डॉ. रजनीकांत आरोळे यांनी ग्रामीण भागातील गोरगरीब जनतेची आरोग्य सेवा करता यावी म्हणून ४०-५० वर्षांपूर्वी हा भाग निवडला. त्यांनी केलेल्या सेवेमुळे ते एक देव ठरले. तीच सेवा पुढे डॉ. शोभा आरोळे व रवि आरोळे हे करत आहेत. आज आमदार रोहित पवार यांच्या माध्यमातून या ठिकाणी पुण्याहून डॉ. डी. वाय. पाटील महाविद्यालयातील हॉस्पिटलचा स्टाफ या ठिकाणी आलेला होता. आणि त्यांनी या शिबिरात वेगवेगळ्या आजारांचे निदान व त्यावर उपचार केले. तालुक्यातील व परिसरातील रुग्ण मोठ्या प्रमाणात या शिबीराचा लाभ घेत आहेत. या माध्यमातून जामखेड तालुका आरोग्य संपन्न होण्यास नक्कीच मदत होईल. या कामगिरीबद्दल मी आयोजकांचे डॉ. डी. वाय. पाटील हॉस्पिटल व डॉ. आरोळे हॉस्पिटलचे आयोजकांच्या वतीने आभार मानतो. असेही वक्तव्य ज्येष्ठ नेते मधुकर राळेभात यांनी यावेळी केले.
यावेळी बोलताना डॉ. शोभाताई आरोळे म्हणाल्या की, कर्जत-जामखेड एकात्मिक बालविकास प्रकल्प , डॉ. डि.वाय.पाटील आर्युर्वेदिक रुग्णालय पुणे, डॉ.आरोळे हाॅस्पिटल व जामखेड येथिल आरोग्य विभाग यांच्या संयुक्त विद्यमाने होत असलेल्या शिबीरामुळे ग्रामीण भागातील रूग्णांना याचा फायदा होत असल्याचा मोठा आनंद वाटत आहे. या शिबीरासाठी खुप लांबून व मोठय़ा संख्येने लोक आले होते. यासाठी आ. रोहीत पवार, डि.वाय.पाटील रुग्णालयाची टीम व स्थानिक पदाधिकाऱ्यांचे मी व आमचे बंधू रवि आरोळे आम्ही आभार मानतो. असे वक्तव्य डॉ. आरोळे हॉस्पिटलच्या संचालिका डॉ. शोभाताई आरोळे यांनी केले आहे.
या शिबीराचा ४३४ रुग्णांनी लाभ घेतला.
आ. रोहित पवार यांच्या संकल्पनेतून कर्जत-जामखेड एकात्मिक विकास संस्था, डॉ. डि.वाय.पाटील आर्युर्वेदिक रुग्णालय पुणे, डॉ.आरोळे हाॅस्पिटल यांच्या संयुक्त विद्यमाने दि.११ व दि.१२ फेब्रुवारी पर्यंत शहरांसह तालुक्यातील रुग्णांसाठी मोफत आरोग्य तपासणी शिबीराचे आयोजन करण्यात आले होते. या शिबिरात फुफ्फुसे, हृदय, हाडे, सांधे, किडनी, कान, नाक, घसा इत्यादीं आजारांची मोफत तपासणी करण्यात आली. यावेळी डॉ. आरोळे हाॅस्पिटलच्या संचलिका डॉ.शोभाताई आरोळे, जेष्ठ नेते प्रा. मधुकर राळेभात, नगरसेवक अमित जाधव, आसिफ पठाण, आ. रोहित पवार यांचे आरोग्य विभागचे स्विय सहाय्यक मारुती बारस्कर तसेच डॉक्टर, सिस्टर, ब्रदर्स आदिंसह रुग्ण मोठ्या संख्येने उपस्थित होते.