खेड तालुक्यात होणार्‍या ग्रामपंचायतींच्या निवडणुकांच्या पार्श्वभूमीवर शिंदे गटाकडून ठाकरे गटाचे नेते भास्कर जाधव यांना घेरण्याची तयारी सुरु केली आहे .तालुक्यातील १० ग्रामपंचायतींच्या निवडणुकांपैकी दोन ग्रामपंचायती बिनविरोध झाल्या आहे. हे जरी खरे असले तरी ज्या ग्रामपंचायतीमध्ये निवडणुका होणार आहेत, त्यातील गुहागर मतदारसंघात येणार्‍या ग्रामपंचायतीत मात्र, ठाकरे गटासमोर शिंदे गटाने आव्हान उभे केले.
गुहागर मतदारसंघ हा जाधव यांचा मतदारसंघ आहे. या मतदारसंघातील घाणेखुंट, भेलसई, कोंडीवली, निळीक, अलसुरे (गावपॅनेल बिनविरोध), भोस्ते आणि संगलट या सात ग्रामपंचायतीमध्ये निवडणूक होणार आहे. गेल्या निवडणुकीत यातील बहुतांश ग्रामपंचायतीवर शिवसेने वर्चस्व निर्माण केले होते. त्यानंतर आमदार भास्कर जाधव यांनी राष्ट्रवादीतून शिवसेनेत प्रवेश केल्याने गुहागर मतदार संघातील बर्‍याचशा ग्रामपंचायतीवरही शिवसेनेचा भगवा फडकला. मात्र राज्यात झालेल्या सत्ता परिवर्तनानंतर कोकणातील बहुतांश भागात शिवसेनेचे दोन गट निर्माण झाले.
शिवसेना उद्धव ठाकरे गट आणि बाळासाहेबांची शिवसेना या दोन्ही गटाकडून ग्रामपंचायत निवडणुकीसाठी मोर्चेबांधणी करण्यात येत आहे. त्यामुळे गुहागर मतदार संघातील घाणेखुंट, भेलसई, कोंडीवली, निळीक, भोस्ते, संगलट या ग्रामपंचायतीमधून ठाकरे विरुद्ध शिंदे गटात चुरशीची लढत पहायला मिळेल. त्यामुळे गुहागर मतदार संघात ठाकरे गटाला शिंदे गटाचे कडवे आव्हान असून भोस्ते, घाणेखुंट या महत्वाच्या ग्रामपंचायतीमध्ये सरपंचपदासाठी जोरदार रस्सीखेच पाहावयास मिळते.
भोस्ते ग्रामपंचायतीमध्ये फक्त सरपंचपदासाठी सहा उमेदवार निवडणुकीसाठी मैदानात उतरले आहे. त्यामुळे भोस्तेत सरपंचपदासाठी शिंदे गट आणि ठाकरे गटात रस्सीखेच सुरु आहे. घाणेखुंट ग्रामपंचायतीमध्ये सरपंच पदासह ११ ग्रामपंचायत सदस्यांसाठी निवडणूक होत आहे. घाणेखुंट ही लोटे औद्योगिक वसाहतीच्या नजीकची ग्रामपंचायत असल्यामुळे या ग्रामपंचायतीला मोठे वलय प्राप्त झाले आहे. त्यामुळे या ठिकाणी अटीतटीचा सामना पाहायला मिळेल.
