जळगावातील धक्कादायक घटना; दोन गटांत तुफान दगडफेक

धनंजय कुलकर्णी-उपसंपादक,दै.महाराष्ट्र सूर्योदय

जळगावातील धक्कादायक घटना; दोन गटांत तुफान दगडफेक

जळगाव(प्रतिनिधी):- जळगावमधून धक्कादायक घटना समोर आली आहे. धार्मिक स्थळाच्या बांधकामाला विरोध केल्यामुळे दोन गटात तुफान राडा झाला आहे. त्यानंतर दोन्ही गटाकडून दगडफेक करण्यात आली. या घटनेमध्ये सहा जण जखमी झाले आहेत. जळगावच्या सुप्रीम कॉलनी परिसरातील ही घटना आहे. दगडफेकीच्या घटनेमुळे परिसरात तणावाचं वातावरण निर्माण झालं. घटनेची माहिती मिळताच एमआयडीसी पोलीस ठाण्याच्या कर्मचाऱ्यांनी घटनास्थळी धाव घेत परिस्थिती आटोक्यात आणली.

नेमकं काय घडलं?

घटनेबाबत अधिक माहिती अशी की, जळगावच्या सुप्रीम कॉलनी परिसरात एका धार्मिकस्थळी बांधकाम सुरू आहे. या बांधकामाला एका गटानं विरोध केल्यामुळे दोन गट आमने-सामने आले. जोरदार राडा झाला. दोन्ही गटाकडून तुफान दगडफेक करण्यात आली आहे. या घटनेमध्ये दोन्ही गटातील सहा जण जखमी झाल्याची माहिती समोर आली आहे. या घटनेनंतर परिसरात तणावपूर्ण वातावरण निर्माण झालं होतं.

पोलिसांची घटनास्थळी धाव

दरम्यान घटनेची माहिती मिळताच एमआयडीसी पोलीस ठाण्याच्या कर्मचाऱ्यांनी घटनास्थळी धाव घेत परिस्थिती आटोक्यात आणली. त्यानंतर याठिकाणी पोलिसांचा मोठा फौजफाटा तैनात करण्यात आला आहे. अचानक घटलेल्या या प्रकारामुळे परिसरात तणावाचं वातावरण निर्माण झालं होतं.