फ्रंटीयर एजन्सीच्या विरोधात सफाई कामगारांची पोलीस अधीक्षकाकडे धाव – नऊ महिन्याच्या थकित वेतनाची मागणी

फ्रंटीयर एजन्सीच्या विरोधात सफाई कामगारांची पोलीस अधीक्षकाकडे धाव – नऊ महिन्याच्या थकित वेतनाची मागणी

बीड दि. १२ (प्रतिनिधी): प्राथमिक आरोग्य केंद्राच्या ठिकाणी साफ-सफाई करणाऱ्या सफाई कामगारांना गेल्या नऊ महिन्यापासूनचे वेतन न दिल्यामुळे त्यांच्या कुटुंबावर उपासमारीची पाळी आली आहे. वेठबिगारासारखे राबवून घेणाऱ्या खाजगी फ्रंटीयर एजन्सी आणि सब-एजन्सी विरोधात फौजदारी स्वरुपाचा गुन्हा नोंदवावा अशी मागणी सफाई कामगार संघटनेने बीड जिल्हा पोलीस अधीक्षकाकडे केली आहे.

या संदर्भात अधिक माहिती अशी की, सदरील सफाई कामगार नोव्हेंबर २०२३ पासून निवेदने देवून उपोषणे करुन थकित वेतनाची मागणी करत आहेत. त्यासाठी आरोग्य अधिकारी सरकारी कामगार अधिकारी आणि अपर जिल्हा दंडाधिकारी यांनीही फ्रंटीयर एजन्सीला वेळोवेळी सूचना दिलेल्या आहेत. मात्र, काहीच कार्यवाही झालेली नाही. गुडीपाडवा, डॉ. आंबेडकर जयंती सारख्या सणासाठी सुध्दा सफाई कामगारांना त्यांच्या कष्टाचे वेतन मिळाले नाही. त्यामुळे कॉन्ट्रॅक्ट लेबर ॲक्ट सेंट्रल रुल १९७१ आणि पेमेंट ऑफ वेजेस ॲक्ट अन्वये गुन्हा नोंदवून सफाई कामगारांना न्याय द्यावा अशी मागणी सफाई कामगार संघटनेच्या वतीने बीड जिल्हा पोलीस अधीक्षक यांना कण्यात आली आहे. सदरील तक्रार अर्जावर बालाजी खुरमुरे (अध्यक्ष), कॉ. नामदेव चव्हाण (सरचिटणीस) सह अन्य कामगारांच्या सहया आहेत.