नवी दिल्ली : राष्ट्रपती रामनाथ कोविद यांनी आज कोरोनाची लस टोचून घेतली आहे. राष्ट्रपतींनी नवी दिल्ली येथील आर्मी हॉस्पीटल रिसर्च अॅण्ड रेफ्रल अर्थात आर.आर.रुग्णालयामध्ये करोनाची लस टोचून घेतली. एक मार्चपासून देशामध्ये करोना प्रतिबंधक लसीकरणाचा दुसरा टप्पा सुरु झाला आहे.
या दुसऱ्या टप्प्यामध्ये ज्येष्ठांसह गंभीर आजाराच्या व्याधी असलेल्या ४५ वर्षांवरील नागरिकांना सरकारी रुग्णालयांत मोफत लस देण्यात येणार असल्याचे केंद्राने स्पष्ट केले होते. याच टप्प्यामध्ये ७५ वर्षीय कोविंद यांनी आज लसीचा पहिला डोस घेतला आहे.
पहिल्या दिवशी पंतप्रधान नरेंद्र मोदींबरोबरच राष्ट्रावादी काँग्रेसचे वरिष्ठ नेते शरद पवार, बिहारचे मुख्यमंत्री नितीश कुमार यासारख्या नेत्यांनीही लस घेतली. मोदींनी भारत बायोटेकच्या ‘कोव्हॅक्सिन’चा डोस घेतला. सध्या देशामध्ये ५० लाखांहून अधिक पात्र व्यक्तींनी लसीकरणासाठी नोंदणी केली आहे. यापैकी सहा लाख ४४ हजार नागरिकांना पहिल्या दिवशी वेळ देण्यात आला.