पेट्रोल पंपावर पंतप्रधान नरेंद्र मोदी यांचा फोटो असलेली जाहिराती येत्या ७२ तासात हटवण्याचे आदेश निवडणूक आयोगाने सर्व पेट्रोलचालक मालकांना दिले आहेत. काही दिवसांपूर्वी तृणमूल काँग्रेसने या जाहिरातीवर आक्षेप घेतला होता. तसेच निवडणूक आयोगाकडे या जाहिराती संदर्भात तक्रार दाखल केली होती.
पेट्रोल पंपावर केंद्र सरकारच्या योजनांची जाहिरात करणाऱ्या होर्डिंगवर पंतप्रधानांचा फोटो असणं आचारसंहितेचे उल्लंघन असल्याचे निवडणूक आयोगाने आपल्या निर्णयात म्हटले आहे. निवडणूक आयोगाने शुक्रवारी पश्चिम बंगाल, आसाम, केरळ, तामिळनाडू आणि पद्दुचेरी या पाच राज्यांच्या निवडणूक तारखांची घोषणा केल्यानंतर आचारसंहिता लागू झाली होती.
तृणमूल काँग्रेसने केलेल्या तक्रारीनंतर निवडणूक आयोगाकडून हा आदेश देण्यात आला आहे. सोमवारी भाजपानेही तृणमूल काँग्रेसविरोधात निवडणूक आय़ोगाकडे धाव घेत आचारसंहिता लागू झालेली असतानाही पश्चिम बंगालमधील दोन मंत्री मतदारांना आकर्षित करण्यासाठी आश्वासन देत असल्याचा आरोप केला होता. भाजपाने दोन्ही मंत्र्यांना विधानसभा निवडणूक लढण्यापासून रोखण्यात यावं अशी मागणी केली आहे.