औरंगाबाद : राज्यात तसेच देशभरात आत्महत्येचे सत्र काही थांबायचे नाव घेत नाही. त्यात आता शिवसेनेच्या पदाधिकाऱ्याने गळफास घेऊन आत्महत्या केली आहे. या घटनेमुळे एकच खळबळ उडाली आहे. मात्र आत्महत्येचे कारण अद्याप समोर आलेले नाही.
मिळालेल्या माहितीनुसार औरंगाबाद जिल्ह्यातील शिवसेनेच्या उप तालुका प्रमुख असलेले सुनिल खजिनदार याने आपल्या प्रेयसीच्या घरी गळफास घेऊन आपले जीवन संपवले आहे. तसेच सुनील हा दौलताबादमधील ग्रामपंचायत सदस्य देखील होता.
मात्र या सर्व घटनेवर त्यांच्या कुटुंबीयांनी संशय व्यक्त करत सखोल चौकशीची मागणी केली आहे. तसेच नातेवाईकांनी दौलताबाद पोलीस स्टेशनबाहेर ठिय्या मांडला आहे. त्यामुळे याठिकाणी शेकडोंचा जमाव गोळा झाला होता. नातेवाईकांनी सुनिलची हत्या झाल्याचा संशय व्यक्त केला आहे. गुन्हा दाखल करण्याची मागणी सुनिलच्या नातेवाईकांकडून केली जात आहे. परिणामी परिसरात तणावपूर्ण शांततेचं वातावरण पाहायला मिळतं आहे.
