अमरावती : आपल्या वरिष्ठ अधिकाऱ्यांच्या जाचाला कंटाळून दिपाली चव्हाण हिने सर्विस रिव्हॉल्व्हरने गोळी झाडून राहत्या घरी आत्महत्या केली होती. या प्रकरणी डीएफओ शिवकुमार आणि श्रीनिवास रेड्डी यांना अटक करण्यात आली होती. मात्र या घटनेमुळे राजकीय वातावरण सुद्धा चांगलेच तापू लागले होते.
त्यात आता दिपाली चव्हाण हिला आत्महत्येस प्रवृत्त करणाऱ्या डीएफओ शिवकुमार आणि श्रीनिवास रेड्डी या दोन्ही आरोपींच्या प्रतिमेचे दहन राणा दाम्पत्याने केले. खासदार, आमदार, गावकरी आणि वनरक्षक यांच्या उपस्थितीत दीपाली चव्हाण यांना श्रद्धांजली अर्पण केली.
दीपाली चव्हाण यांनी आत्महत्या केलेल्या हरीसाल येथील शासकीय निवासस्थानाला नवनीत राणा आणि रवी राणा यांनी भेट दिली.
घटनास्थळाची पाहणी करत ही दुर्दैवी घटना कशी घडली याची माहिती शेकडो आदिवासी बांधव आणि गावकऱ्यांच्या उपस्थितीत घेतली.
या गंभीर घटनेची सखोल चौकशी व्हावी आणि भविष्यात अशा घटना घडू नयेत, यासाठी खासदार म्हणून आपण संसदेत आणि आमदार रवी राणा विधानसभेत खंबीरपणे आवाज उचलणार असल्याचे, नवनीत राणांनी सांगितले. दोषींना फक्त कठोर शिक्षा नव्हे, तर फाशीच झाली पाहिजे, अशी मागणी करणार असल्याचंही त्यांनी यावेळी सांगितले.