मनिला | भारतासह जगभरातील कोरोना रुग्णांमध्ये दिवसेंदिवस अधिकाधिक वाढ झालेली पाहायला मिळत आहे. अनेक ठिकाणी कोविड लाॅकडाऊन देखील लावण्यात आला आहे. लोकांकडून कोरोनाच्या नियमाचे पालन केलं जावं यासाठी प्रशासन सज्ज झाले आहे. यानिमित्तानं पुन्हा एकदा लोकांना 2020 च्या वेळी रस्त्यावर जे पोलिस आणि जनतेचं चित्र दिसलं होतं, त्याची आठवण झाली आहे.
फिलीपीन्समधून अशीच एक धक्कादायक घटना समेर आली आहे. एका व्यक्तीनं कोरोनाचा नियम मोडल्याने पोलिसांनी या माणसाला दंड बैठका मारण्याची शिक्षा दिली. 300 दंड बैठका मारल्यानंतर या व्यक्तीचा जागीच मृत्यू झाला आहे. ही घटना 1 एप्रिलला घडली आहे.
‘मेट्रो न्यूज’ने दिलेल्या माहितीनुसार या माणसाचं नाव डॅरेन पेनारेडोंदो असून वय 28 वर्ष होतं. घरातलं पाणी संपल्यामुळे नाईलाजाने हा माणूस रस्त्यावर उतरला होता. त्याचवेळी स्थानिक पोलिसांनी त्याला रस्त्यावर अडवलं आणि शिक्षा म्हणून दंड बैठका काढायला लावल्या.
दरम्यान, सुरूवातीला पोलिसांनी 100 दंड बैठका मारायला लावल्या. लगेचचं या माणसाने ही शिक्षा पूर्ण केली. त्यानंतर पोलिसांनी पुन्हा शिक्षा वाढवत या तरूणाला 300 बैठका मारायला लावल्या. ही शिक्षा पूर्ण केल्यानंतर पोलिसांनी त्याला सोडून दिलं. पण जेव्हा ही व्यक्ती घरी पोहोचली तेव्हा अवस्था खूपच खराब होती. अंगात ताल नसल्याने त्याने जागीच आपले प्राण सोडले. या माणसाला एक लहान मुलगा सुद्धा आहे.
