नाशिक : राज्यात वाढत्या कोरोनाच्या पार्श्वभूमीवर सामान्य नागरिकांबरोबर अनेक राजकीय पुढाऱ्यांना सुद्धा आपले प्राण गमवावे लागले आहे. त्यात आता नाशिक जिल्हयातुन एक धक्कादायक बातमी समोर येत आहे.
शिवसेना पक्षाच्या ज्येष्ठ नगरसेविका कल्पना पांडे यांचे कोरोनामुळे रविवारी निधन झाले आहे. आज पहाटेच्या सुमारास कल्पना पांडे यांची प्राणज्योत मालवली. कल्पना पांडे या नाशिक प्रभाग क्रमांक २४ चे प्रतिनिधित्व करत होत्या.
कल्पना पांडे यांना काही दिवसांपूर्वी कोरोनाची लागण झाली होती. त्यांच्यावर नाशिकमध्ये एका खासगी रुग्णालयात उपचार सुरु होते. उपचारादरम्यान त्यांचा मृत्यू झाला. त्यांच्या निधनाने नाशिक मधील शिवसैनिकांना जबरदस्त धक्का बसला आहे.
नाशिक महापालिका निवडणुकीत त्या सलग चार वेळा निवडून आल्या होत्या. कल्पना पांडे यांनी सिडको प्रभाग सभापती म्हणून दोन वेळा काम पाहिले आहे. तसेच नाशिक महापालिकेतील अनेक समित्यांवरही त्यांनी काम केले आहे. कोरोना काळात कल्पना पांडे /यांनी रुग्णाला रुग्णालय मिळवून देणं, औषधाची सोय करणं, जनजागृती करणं, यासारखी अनेक कामे केली होती.
