*आळंदीकरांची मदत पोहोचली अतिवृष्टी झालेल्या भागात..*

आळंदी नगरीचे नगरसेवक तथा मा. उपनगराध्यक्ष सचिन रामदास गिलबिले व मा. नगरसेवक दिनेश घुले यांच्या मार्गदर्शनाखाली आळंदी शहर व विविध भागातून अतिवृष्टी झालेल्या पूरग्रस्त भागातील गरजू बांधवांच्या मदतीसाठी किराणा व इतर सामान गोळा केले होते. सोमवार दि. ०२ ॲागस्ट २०२१ रोजी सातारा जिल्ह्यातील महाबळेश्वर तालुक्यातील अतिवृष्टी झालेल्या मेठतळे, शिरवली, कसरूड व हातलोट या भागातील गरजू नागरिकांना या सर्व किराणा किटचे वाटप केले. याकामी येळे येथील यशवंत ट्रस्टचे अध्यक्ष रवी बोडके व वाई येथील उद्योजक ऋषिकेश भूतकर यांची खूप मोलाची मदत झाली. आळंदी वरुन एवढ्या लांबून ही मदत त्या ठिकाणी मिळाल्यावर नागरिकांच्या चेहऱ्यावरचा आनंद ओसंडून वाहत होता.
अतिशय भयानक परिस्थितीमध्ये त्या ठिकाणी प्रचंड पाऊस सुरु असताना मेठतळे गावचे सरपंच विठ्ठल शिंगरे व पोलीस पाटील मंगेश शिंगरे यांच्या मदतीने मेठतळे येथील मंदीरात सर्व नागरिकांना बोलावून त्या ठिकाणी किराणा किटचे अतिशय चांगल्या पध्दतीने वाटप करण्यात आले. या कामी मोठ्या मनाने आर्थिक व वस्तू स्वरूपात मदत केलेल्या आळंदीकरांचे पूरग्रस्त बांधवांनी आभार मानले.
पूरग्रस्त बांधवांना ही मदत पोहोच करण्यासाठी नगरसेवक सचिन रामदास गिलबिले, मा. नगरसेवक दिनेश घुले, राकेश सिंग, उमेश थोरवे, परेश सुर्यवंशी, सुरज जंगम, सागर बद्दप, संतोष वायाळ, बळीराम खंदारे व अन्य मित्र परिवार उपस्थित होते.