मंत्री छगन भुजबळ तसेच शिवसेना आमदार सुहास कांदे यांच्यात झालेला भर सभेतील शाब्दिक वाद चांगलाच रंगला होता. तसे कांदे यांनी भुजबळ यांच्यावर केलेल्या आरोपामुळे खळबळ उडाली होती. आता हा वाद संपत नाही तोच शिवसेना तसेच राष्ट्रवादीचे नेते आमनेसामने आले आहेत. आमच्या काळात झालेल्या कामाचे श्रेय घेऊ नका असे म्हणत शिवसेनेचे माजी आमदार योगेश घोलप यांनी राष्ट्रवादीचे आमदार सरोज आहेर यांच्यावर सडकून टीका केली आहे.
शिवसेनेचे माजी आमदार योगेश घोलप यांनी राष्ट्रवादी पक्षाचे विद्यमान आमदार सरोज आहेर यांच्यावर गंभीर आरोप केले आहेत. आमच्या काळात झालेल्या कामांचे श्रेय घेऊ नका असे माजी आमदार योगेश घोलप सरोज आहेर यांना उद्देशून म्हणाले आहेत. देवळाली मतदारसंघातील विकासकामाच्या संदर्भाने त्यांनी हे वक्तव्य केले आहे.
नाशिक जिल्ह्यातील देवळाली या मतदारसंघात काही विकासकामांच्या उद्घाटनाचा समारंभ पार पडला होता. या कार्यक्रमाला जलसंपदा मंत्री जयंत पाटील आणि तसेच नाशिकचे पालकमंत्री छगन भुजबळ उपस्थित होते. या कार्यक्रमाचे आयोजन सरोज आहेर यांनी केले होते. याच उद्घाटन कार्यक्रमानंतर योगेश घोलप आक्रमक झाले आहेत. त्यांनी हे काम माझ्या कारकिर्दीत झाले आहे, असा दावा केला. तसेच कामांचे श्रेय घेण्याचे आहेर यांनी थांबवावे अशी खोचक टिप्पणी घोलप यांनी केली आहे
