निकेश विंचुरकर चांदुर बाजार तालुका प्रतिनिधि;
अचलपुर- गेल्या 3 दिवसापासून वेगवेगळ्या पदधतीने सुरू असलेल्या फिनले मिल कामगारांच्या आंदोलनाच्या तिसर्या दिवशी कामगारांच्या कुटुंबातील सदस्यांनी उपोषण सुरू केले आहे. आता हे आंदोलन चिघळण्याच्या मार्गावर आले आहे.
फिनले मिल कामगारांच्या विविध मागण्यांसाठी कामगार नेते अभय माथने यांच्या नेतृत्वात तीन दिवसापासून आंदोलन सुरू झाले आहे. पहिल्या दिवशी काही कामगार 70 फुट उंच चिमणीवर चढले व अन्य कामगारांनी निदर्शने केली. दुसर्या दिवशीही चिमणीवर चढलेले कामगार तेथेच होते. तर उर्वरीत कर्मचार्यांनी चक्काजाम आंदोलन केले. बुधवार तिसर्या दिवशी चिमणीवर चढलेल्या कामगारांची प्रकृती खालावल्याने त्यांना रुग्णालयात दाखल करण्यात आले. आंदोलनाची तीव्रता कमी होऊ नये म्हणून आता गिरणी कामगारांच्या परिवारातील महिला व मुले आणि अन्य सदस्यांनी उपोषण सुरू केले आहे.
त्यांच्या आक्रमक पवित्र्यामुळे फिनले मिल प्रशासन चांगलेच घाबरले आहे. दुसरीकडे जिल्हातील राजकीय नेत्यांनी मात्र सदर आंदोलनाला प्रत्यक्ष भेट वा पाठींबा न दिल्याने कामगारांमध्ये नेत्यांविरोधात संतापाची भावना आहे. गेल्या तीन दिवसापासून सुरु असलेले आंदोलन चिघळण्याच्या मार्गावर आहे. चिमनी आंदोलन, रास्तारोको आणि आज कामगारांच्या परिवारातील लहान मुले, महिलांनी उपोषण सुरू केले. जो पर्यंत मागण्या मान्य होत नाही, तोपर्यंत आंदोलन सुरूच राहणार असल्यााचा निर्धार कामगारांनी व्यक्त केला.