भाजप प्रदेशाध्यक्ष चंद्रशेखर बावनकुळे यांनी विरोधी पक्षनेते अजित पवार यांच्यावर निशाणा साधला आहे. माध्यमांशी बोलताना बावनकुळे म्हणाले, “अजित पवारांना आता सत्तेची स्वप्ने पडायला लागली आहे. अडीच वर्षे महाराष्ट्रामध्ये मोगलशाही आणि एकतर्फी सरकार चालवले. त्यामुळे आता ते कधीच सत्तेत येणार नाहीत. अशी परिस्थिती आहे.” असा खोचक टोला बावनकुळे यांनी अजित पवारांना लगावला.
रविवारी साताऱ्यात झालेल्या एका सभेत बोलताना अजित पवार यांनी राज्यातील अधिकाऱ्यांना इशारा दिला होता. “अधिकाऱ्यांनी कोणाच्या दबावाला बळी पडू नये. आम्ही कधी सत्तेत येऊ तुम्हाला कळणारही नाही.” असे वक्तव्य अजित पवार यांनी केले होते. तसेच, “आम्ही सत्तेत असताना आमच्या हातात सर्व संस्था होत्या; परंतु आम्ही कधी सत्तेचा माज दाखवला नाही.
पुढे बोलताना ते बोलले की, आज राज्यात जे काही चालले आहे, ते गंभीर आहे. त्यामुळे अधिकाऱ्यांना इतकेच सांगतो की, कुणाच्याही दबावाला बळी पडू नका. सत्तेत असणाऱ्यांच्या सांगण्यावरून कोणालाही त्रास देऊ नका. आम्ही सत्तेत कधी येऊ, हे तुम्हाला कळणार नाही.” असा इशारा अजित पवार यांनी दिला होता.