खेड तालुक्यातील कहू येथे बिबट्याच्या हल्ल्यात गाय मृत्यूमुखी

खेड तालुक्यातील कहू येथे बिबट्याच्या हल्ल्यात गाय मृत्यूमुखी
9 डिसेंबर 2022
राजगुरूनगर : गाव कहू (चासकमान) ता. खेड येथे बिबट्याने केलेल्या हल्ल्यात एक गाय मृत्यूमुखी पडली आहे. सकाळी पहाटे सदर गाय इतर गाईबरोबर कहू येथील डोंगरावर चरत असताना बिबट्याने अचानक येउन हल्ला केला व गाईला ओढत जवळच्या झूडपात घेऊन गेला. यात गाईचा मृत्यू झाला आहे. धरण क्षेत्रातील घनदाट जंगल असल्याने गाईचा शोध घेण्यास स्थानिकांना अडचणी येत होत्या. सदर गाय ही स्थानिक शेतकरी बाळासाहेब दाते यांच्या मालकीची असून यामुळे त्यांचे पन्नास ते साठ हजारांचे नुकसान झाले. वनविभागाला या संदर्भात माहिती देण्यात आली असून इतर शेतकरी व ग्रामस्थ यांना सुरक्षितता बाळगण्या संबंधी सूचना देण्यात आल्याचे पोलीस पाटील अनिल दाते व सरपंच सुरेश केदारी यांनी सांगितले. गावचे उपसरपंच ऍड. संतोष दाते यांनी वनविभागाला बिबट्याचा बंदोबस्त करण्याची मागणी केली आहे.लवकरात लवकर वन क्षेत्राची तपासणी करून बिबट्याचा वावर असलेल्या ठिकाणी पिंजरा लावावा अशी मागणी त्यांनी केली आहे. प्रतिनिधी : विनायक जठार