शिंदे-फडणवीस सरकारच्या स्थापनेला सात महिन्यांचा कालावधी झाला आहे. तरीदेखील मंत्रिमंडळाचा विस्तार झालेला नाही. फक्त १८ मंत्री सध्या सरकार चालवत आहेत. यावरूनच शिंदे-फडणवीस सरकारवर राष्ट्रवादीचे नेते एकनाथ खडसे यांनी टीका करत मंत्रिमंडळाचा विस्तार लांबणीवर टाकण्याचे कारणच उघड केले.
एकनाथ खडसे म्हणाले, सध्या १८ मंत्र्यांच्या भरवशावर सरकारचा कारभार सुरू आहे. मात्र, खरे पाहता सत्ताधारी पक्षातील प्रत्येक आमदार मंत्रिपदासाठी गुडघ्याला बाशिंग बांधून बसला आहे. पण मंत्रिमंडळाचा विस्तार झाला की, आपोआप असंतोष उफाळून येईल. त्या असंतोषाला तोंड देणे सरकारला कठीण होईल.
त्यामुळे मंत्रिमंडळाचा विस्तार केला जात नाही, असे खडसे म्हणाले. कल्याण येथील एका कार्यक्रमासाठी एकनाथ खडसे हे उपस्थित होते. यावेळी शिंदे व फडणवीस सरकार मंत्रिमंडळाचा विस्तार लांबणीवर पडत आहे, याविषयी खडसे यांना विचारणा केली असता त्यांनी हे उत्तर दिले. खडसे म्हणाले, १८ मंत्री राज्याचा कारभार चालवत असल्याने योग्य तो निर्णय होऊ शकत नाही.
तसेचजनसंपर्क कमी पडतोय. भाजपमधील अनेक आमदार व शिंदे गटातील आमदार मंत्रिमंडळात यायला इच्छुक आहेत. त्यामुळे कोणाला मंत्रिमंडळात घ्यायचे हा पेच असल्याने मंत्रिमंडळाचा विस्तार होत नाही, असे ते म्हणाले. आंबेडकर आणि ठाकरे युतीविषयी खडसे म्हणाले, प्रकाश आंबेडकर आणि उद्धव ठाकरे यांच्यात युती झाली.
