कोल्हापूर : देशात खाजगी निमसरकारी, सहकार क्षेत्रातून सेवानिवृत्त झालेल्या ६७ लाख कामगारांना पेन्शनवाढ होईपर्यन्त केंद्र सरकारकडे पाठपुरावा करण्याचे आश्वासन खा. धैर्यशील माने यानी दिले.संसदेत पार पडलेल्या अर्थसंकल्पीय अधिवेशनात शून्य प्रहारात खा. धैर्यशील माने यानी केंद्राच्या ईपीएस ९५ योजनेतील ६७ लाख पेन्शनरांना खा. खोशियारी समितीच्या शिफारसी प्रमाणे पेन्शनवाढ लागू करून केंद्र सरकारने संवेदनशिलता दाखवून न्याय द्यावा अशी मागणी केली होती.
या अनुषंगाने निवृत्त कर्मचारी ईपीएस ९५ राष्ट्रीय समन्वय समिती व कोल्हापूर जिल्हा पेन्शनर संघटनेच्या वतीने खा. माने यांचा शाल फेटा बांधून जेष्ठ पेन्शनर आनंदराव आबीटकर यांच्या हस्ते सत्कार करण्यात आला. सत्कार प्रसंगी बोलताना खा.माने म्हणाले संसदेत पेन्शनवाढीचा प्रश्न उपस्थित केलेवर दिल्लीतील पेन्शनर संघटना भेटल्या तसेच इतर ठिकाणाहूनही पेन्शनरांनी संपर्क करून अभिनंदन करीत आपल्या व्यथा मांडल्याचे सांगून पेन्शनवाढी संदर्भात लेखी उत्तराची मागणी केली असून पेन्शनरांचे सर्वच प्रश्न सोडवण्यास प्राधान्य देणार असल्याचे सांगीतले.
केंद्र सरकारने पेन्शनवाढीसाठी नेमलेल्या समित्या वेळकाढू आहेत ते थांबवून तात्काळ पेन्शनवाढीचा निर्णय व्हावा, पेन्शनरांच्या निधनानतंर पत्नीस अर्धी पेन्शन मिळते ती पूर्ण मिळावी अशी मागणी संघटनेच्या वतीने करण्यात आली. निवृत्त कर्मचारी राष्ट्रीय समन्वय समितीचे समन्वयक दिलीप पाटील, राष्ट्रीय सदस्य शिवाजी देसावळे, शिवाजी सावंत, कोल्हापूर जिल्हा पेन्शनर संघटनेचे संघटक सुभाष गुरव,के.डी.माने, शंकर चांगले, आनंदा दिंडे,के.डी. पाटील, जे.के.बेलेकर यासह पेन्शनर उपास्थित होते
