धनंजय कुलकर्णी-उपसंपादक,दै.महाराष्ट्र सूर्योदय
चंद्रपूर जगात तिसऱ्या क्रमांकाचे सर्वाधिक उष्ण शहर; तर अकोला आठव्या स्थानी
बीड(प्रतिनिधी):- अकोला जिल्ह्याने सलग दुसऱ्या दिवशी जगभरातील पहिल्या दहा उष्ण शहरांमध्ये स्थान मि‌ळविले
सोमवारी अकोला हे देशातील दुसऱ्या तर जगातील आठव्या क्रमांकाचे उष्ण शहर ठरले. तेथे ४२.९अंश सेल्सिअस तापमानाची नोंद करण्यात आली. विदर्भातील गडचिरोली (३९.४) जिल्हा वगळता सगळ्याच जिल्ह्यातील तापमान ४० अंशांहून अधिक होते. यात अकोलाखालोखाल चंद्रपुरात ४२.२ अंश इतक्या तापमानाची नोंद करण्यात आली. नागपुरातही ४१.४ अंश तापमानाची नोंद झाली. पुढील काही दिवसांत तापमान अधिक वाढणार असल्याचा अंदाज हवामान खात्याने वर्तविला आहे. मंगळवारपासून देशातील अनेक राज्यांमध्ये उष्णतेच्या सौम्य लाटेचा इशारा देण्यात आला आहे. यात गुजरात, पश्चिम मध्य प्रदेश, विदर्भ व राज्यस्थान यांचा समावेश आहे. विदर्भात मंगळवार ते गुरुवार हे तीन दिवस बुलडाणा, अकोला, अमरावती, यवतमाळ आणि वाशीम अर्थात पश्चिम विदर्भातील जिल्ह्यांमध्ये उष्णतेच्या लाटेचा इशारा देण्यात आला आहे. या काळात नागपुरातही पारा वाढणार असल्याचा अंदाज प्रादेशिक हवामान खात्याने वर्तविला आहे.
