भिवेगाव येथे बिबट्याच्या हल्ल्यात शेतकऱ्याचा मृत्यू

दैनिक सूर्योदय पुणे
प्रतिनिधी : विनायक जठार
राजगुरुनगर : जनावरे शेतात घेऊन जाणाऱ्या शेतकऱ्यावर बिबट्याने केलेल्या हल्ल्यात शेतकऱ्याचा जागीच मृत्यू झाला आहे. सदर घटना खेड तालुक्यातील भिवेगाव या ठिकाणी घडली असून लक्ष्मण रामभाऊ वनघरे रा. भिवेगाव, ता.खेड (वय ५०) असे मृत्यू झालेल्या शेतकऱ्याचे नाव आहे. ते तालुका कृषी उत्पन्न बाजार समिती चे माजी उपसभापती श्री विठ्ठल ढवळा वनघरे यांचे चुलत भाऊ असून आपल्या परिवारासोबत भिवेगाव येथे राहत होते. लक्ष्मण रामभाऊ वनघरे हे गुरुवार दि. १९ रोजी सायंकाळी ६ वाजण्याच्या सुमारास शेताच्या बाजूला गवतामध्ये जनावरे चारत होते. बिबट्याने त्यांच्यावर अचानक हल्ला केला व त्यात त्यांचा जागीच मृत्यू झाला. भिवेगाव व आजूबाजूचा परिसर हा डोंगराळ व घनदाट अरण्याचा आहे. त्यामुळे सदर घटनेने आजूबाजूच्या गावांमध्ये भीतीचे वातावरण पसरले आहे. वनविभागाने तातडीने पिंजरा लाऊन बिबट्याचा बंदोबस्त करावा अशी मागणी भिवेगाव ग्रामस्थ व आजूबाजूच्या गावातून करण्यात येत आहे. खेड तालुक्यातील बिबट्याची वाढती संख्या व मानव वस्तीतील वावर हा चिंतेचा विषय बनत चालला आहे. वन विभागाचे संपूर्णपणे दुर्लक्ष होत असल्याची भावना नागरिक बोलून दाखवत आहेत.