बीड :- बीड लोकसभेचे राष्ट्रवादी काँग्रेस आणि इंडिया आघाडीचे उमेदवार बजरंग बप्पा सोनवणे हे सोमवारी (दि. २२) आपला उमेदवारी अर्ज दाखल करणार आहेत. यावेळी राष्ट्रवादी काँग्रेस शरदचंद्रजी पवार पक्षाचे प्रदेशाध्यक्ष जयंत पाटील यांच्यासह घटक पक्षांचे नेते उपस्थित राहणार आहेत. अशी माहिती पक्षाच्या वतीने देण्यात आली.
बीड येथील राष्ट्रवादी भवनात शनिवारी राष्ट्रवादी काँग्रेस शरद पवार गट आणि इंडिया आघाडीच्या वतीने आयोजित करण्यात आलेल्या पत्रकार परिषदेला राष्ट्रवादी काँग्रेस पार्टीचे जिल्हाध्यक्ष तथा आमदार संदीप भैय्या क्षिरसागर, राष्ट्रवादी काँग्रेस शरद पवार गटाचे आणि इंडिया आघाडीचे उमेदवार बजरंग बप्पा सोनवणे, माजी आमदार उषाताई दराडे, राष्ट्रीय काँग्रेसचे जिल्हाध्यक्ष राजेसाहेब देशमुख, माजी आमदार सय्यद सलिम, डीपीआयचे अजिंक्य चांदणे, उबाठा शिवसेनेचे जिल्हा प्रमुख वरेकर, रत्नाकर शिंदे, कॉ. नामदेव चव्हाण, कॉ. अजय बुरांडे, शेकापचे भाई मोहन गुंड हे उपस्थित होते.
उमेदवारी अर्ज दाखल करण्यासंदर्भात बोलताना बजरंग बप्पा सोनवणे म्हणाले की, आम्ही सोमवारी (दि. २२) नामनिर्देशन पत्र सादर करणार आहोत. नामनिर्देशन पत्र सादर करताना राष्ट्रवादीचे नेते आणि प्रदेशाध्यक्ष जयंत पाटील यांच्यासह शिवसेना, राष्ट्रवादी काँग्रेस, कम्युनिस्ट पार्टी, व सर्व घटक पक्षाचे नेते मंडळी उपस्थित राहणार आहे. मात्र उन्हाचा वाढता पारा लक्षात घेता कोणतेही शक्तिप्रदर्शन न करता अत्यंत साधेपणाने उमेदवारी अर्ज दाखल करण्यात आहोत. असे त्यांनी स्पष्ट केले.
