मोठी बातमी! पूजा अरुण राठोडचा यवतमाळमध्ये गर्भपात!
🔸अशोक काळकुटे | संपादक
पूजा चव्हाण आत्महत्या प्रकरणात आणखी एक आणि धक्कादायक अशी मोठी माहिती समोर येत आहे. यवतमाळच्या वसंतराव नाईक या शासकीय वैद्यकीय महाविद्यालयात पूजा अरूण राठोड या नावाच्या मुलीचा गर्भपात झाल्याची नोंद आहे. ही पूजा अरूण राठोड हीच पूजा चव्हाण आहे का? याबाबत कुठलीही माहिती देण्यात आलेली नाही. पण नाव पूजा आणि त्यानंतर ह्या प्रकरणात अरूण राठोडचं असलेलं कनेक्शन यावरुन पूजा चव्हाण हीच पूजा अरूण राठोड असावी, असा अंदाज व्यक्त केला जातो आहे. विशेष म्हणजे मंत्री आणि अरूण राठोड यांची ही व्हायरल ऑडिओ क्लीप आहे त्यातही प्रेग्नंसीबाबत चर्चा होताना दिसते आहे. त्याच पार्श्वभूमीवर ही नवी माहिती महत्त्वपूर्ण मानली जात आहे.
पूजा अरूण राठोड ही ०६ फेब्रुवारीला पहाटे ०४ वाजून ३४ मिनिटांनी हॉस्पिटलमध्ये दाखल झालेली होती.
तशी नोंद देखील अहवालात आहे. तिचा वॉर्ड क्रमांक ०३ होता आणि डॉ. श्रीकांत वराडे यांनी तिच्यावर उपचार केल्याचे रिपोर्टमध्ये दिसत आहे. मिडीयाने डॉक्टरांशी संपर्क केला पण ते नॉट रिचेबल आहेत.
पूजा चव्हाण आत्महत्या प्रकरण काय?
मूळ परळीच्या पूजा चव्हाणचा पुण्यातील राहत्या घरातून पडून ०७ फेब्रुवारीला मृत्यू झाला. पूजाने आत्महत्या केल्याचा प्राथमिक संशय आहे. स्पोकन इंग्लिश क्लासेससाठी ती भावासोबत पुण्यात रहात होती. तिने तिसऱ्या मजल्यावरुन उडी मारुन आत्महत्या केल्याचा आरोप आहे. त्यानंतर आत्महत्येशी विदर्भातील एका मंत्र्याचा संबंध असल्याची चर्चा सुरु झाली होती. भाजपने रितसर तक्रार दाखल केली. इतकंच नाही तर विरोधी पक्षनेते देवेंद्र फडणवीस यांनी थेट पोलीस आयुक्तांना पत्र लिहून, चौकशीची मागणी केली. इतकं सगळं होत असताना, पूजा चव्हाण आणि कथित मंत्र्यांची ऑडिओ क्लिप समोर आली आहे. एक-दोन नव्हे तर तब्बल १२ ऑडिओ क्लिपमुळे चक्रव्यूहात सापडलेले मंत्री संजय राठोड यांचं नावही उघड झाले आहे.
पोस्टमार्टम अहवाल काय म्हणतो?
पोलिसांच्या पंचनाम्यानुसार पूजाने नैराश्यातून आत्महत्या केली आहे. तर पूजाच्या पोस्टमार्टम रिपोर्टनुसार तिच्या डोक्याला जबर मार लागल्याने तिचा मृत्यू झाला आहे. पोलिसांनी या प्रकरणाची आकस्मिक मृत्यू अशी नोंद करून तपास सुरू केला आहे. पोलिसांनी पंचनाम्यात आकस्मिक मृत्यूची नोंद केली आहे. पूजाने आत्महत्या केल्याचे म्हटलेले नाही.
ऑडिओ क्लिपमधून उलगडा ?
पूजा चव्हाणच्या आत्महत्येशी संबंधीत काही ऑडिओ क्लीप व्हायरल झाल्या आहेत. त्या त्याच प्रकरणाशी संबंधित आहेत का? याचाही खुलासा किंवा माहिती ना पोलिसांनी दिली, ना पूजाच्या कुटुंबियांनी. पण त्यात एक व्यक्ती प्रकरण दाबण्यासाठी काही सूचना देत असल्याचे समजत आहे.
