मुंबई : महाराष्ट्रात वीजपुरवठा खंडित झाल्याप्रकरणी चीनच्या सायबर घुसखोरीचा आरोप ऊर्जामंत्री नितीन राऊत यांनी पत्रकार परिषद घेऊन केला होता. तसेच संबंधित प्रकरणाची चौकशी करण्याचे आदेश राज्याचे गृहमंत्री अनिल देशमुख यांनी दिले होते. यावर भाजपा नेते चंद्रशेखर बावनकुळे यांनी आघाडी सरकारवर निशाणा साधला होता. आता बावनकुळे यांच्या टीकेला काँग्रेस प्रवक्ते सचिन सावंत यांनी प्रतिउत्तर दिले आहे.
“भाजपा नेते चंद्रशेखर बावनकुळे हे चीनचे समर्थक आहेत का? चीनची भाषा का बोलत आहेत? चीनच्या रेड इको या ग्रुपचा हात असू शकतो असा अमेरिकेच्या रेकॉर्डेड फ्युचर या कंपनीने भारताच्या सर्टीनला अहवाल दिला आहे. सायबर सेलने ही शक्यता वर्तवली आहे. चीनची चौकशी केली तर भाजपाला त्रास का?” असा सवाल त्यांनी विचारला आहे.
तसेच गृहमंत्री अनिल देशमुख यांनी सुद्धा बावनकुळे यांच्या टीकेला उत्तर दिले आहे. “मुंबई येथील वीज बंद प्रकरण हा तांत्रिक विषय आहे. हा विषय चंद्रशेखर बावनकुळे यांना समजू शकणार नाही. त्यांनी या विषयावर बोलून स्वतःचं हसं करून घेऊ नये.” असा टोला देशमुख यांनी ट्विटद्वारे लगावला आहे.