राजकारणात आपल्याला कोण धक्का देणार नाही, असे सांगलीतल्या एका मोठ्या नेत्याला वाटत होते, पण भाजपने त्यांना यापूर्वी धक्के दिले आहेत. आता येणाऱ्या निवडणुकांमध्ये त्यांना शॉक देणाऱ्या भाजपच्या स्थानिक नेत्याला मी सोन्याचा मुकुट देणार आहे,’ अशी घोषणा भाजपचे प्रदेशाध्यक्ष चंद्रकांत पाटील यांनी दसऱ्याच्या मुहूर्तावर केली.
चंद्रकांत पाटील सांगलीत भाजपच्या कार्यकर्त्यांसमोर बोलत होते. भाजपचे प्रदेशाध्यक्ष चंद्रकांत पाटील यांनी यापूर्वीच सांगली महापालिका आणि इस्लामपूर नगरपरिषदेत सत्तांतर घडवून राष्ट्रवादी काँग्रेसचे प्रदेशाध्यक्ष जयंत पाटील यांना राजकीय धक्के दिले आहेत. आता पुन्हा एकदा जयंत पाटील यांना लक्ष्य करण्याचा प्रयत्न भाजपकडून सुरू आहे.
चंद्रकांत पाटील म्हणाले की, ‘सांगलीतल्या एका मोठ्या नेत्याला असे वाटत होते की, राजकारणात आपल्याला कोण धक्का देणार नाही, पण यापूर्वीच भाजपने त्यांना धक्के दिले आहेत. आता आगामी निवडणुकांमध्ये त्यांना शॉक देणाऱ्या भाजपच्या स्थानिक नेत्याला मी सोन्याचा मुकुट देणार आहे. हा मुकुट कोण मिळवणार ते पाहूया. राज्यात शरद पवार हे भाजपसाठी आव्हान नाहीत. ५६ च्यावर त्यांचे कधीही आमदार निवडून आले नाहीत. त्यामुळे राष्ट्रवादी भाजपसाठी आव्हान ठरू शकत नाही, असेही विधान प्रदेशाध्यक्ष चंद्रकांत पाटील यांनी केले.
