सोलापूर संपादक- महेश पवार
प्रतिनिधी – संतोष विभूते
मतदार जागृती आणि नोंदणीसाठी गेल्या वर्षी वडाळा येथील माऊली महाविद्यालयाने राबविलेल्या उपक्रमाची दखल घेत राज्य निवडणूक आयोगाने महाविद्यालयाला उत्कृष्ठ महाविद्यालय, उत्कृष्ठ नोडल अधिकारी या पुरस्काराने सन्मानित केले आहे.
राज्याचे मुख्य निवडणूक आयुक्त श्रीकांत देशपांडे, जिल्हाधिकारी कुमार आशिर्वाद यांच्या हस्ते हा पुरस्कार देण्यात आला.जिल्हाधिकारी कार्यालयात गुरुवारी हा पुरस्कार वितरण कार्यक्रम झाला.महाविद्यालयाचे प्राचार्य डॉ.शिरीष भोसले, उपक्रम कालावधीतील प्रभारी प्राचार्य डॉ.दत्तात्रय हरवाळकर, नोडल अधिकारी प्रा.डॉ.प्रमोद पाटील यावेळी उपस्थित होते.
राज्य मुख्य निवडणूक आयुक्त देशपांडे म्हणाले, “मतदारांमध्ये मतदान व लोकशाहीविषयी जागृती होणे गरजेचे आहे.हे काम महाविद्यालयाचे विद्यार्थी उत्कृष्ठपणे करु शकतात. तरुणांचा मतदानाचा टक्का वाढविण्यासाठीही महाविद्यालयांनी जागृती करण्याची आवश्यकता आहे.त्यासाठी महाविद्यालयांमधून सातत्याने मतदार जागृतीचे उपक्रम राबविण्यात यावेत.मतदानाच्या दिवशी वृध्द मतदारांना मतदान केंद्रावर नेणे,त्यांची काळजी घेणे,हे काम देखील लोकशाहीची सेवा या भूमिकेतून निःपक्षपातीपणे महाविद्यालयीन विद्यार्थ्यांनी करावे.
महाविद्यालयाचे प्राचार्य डॉ.भोसले म्हणाले, मुळातच संस्थेचे मार्गदर्शक व जिल्ह्याचे ज्मयेष्ठ व ऋषीतुल्य नेते काकासाहेब साठे, संस्थेचे अध्यक्ष व वडाळा गावचे सरपंच जितेंद्रबाबा साठे यांचे मतदार जागृतीसाठी सातत्याने प्रोत्साहन असते.माऊली महाविद्यालयाच्या माध्यमातून माजी प्रभारी प्राचार्य डॉ. दत्तात्रय हरवाळकर, राष्ट्रीय सेवा योजनेच्या माध्यमातून प्रा.डॉ.विकास शिंदे, प्रा.डॉ.प्रमोद पाटील यांच्यासह सर्व प्राध्यापक, विद्यार्थ्यांनी मतदार जागृतीचे चांगले उपक्रम राबविले.यापुढेही महाविद्यालयातून असे उपक्रम सातत्याने राबविण्यासाठी आम्ही कटिबद्ध राहू.